اعتقال شفيق العمراني
اعتقال شفيق العمراني
شفيق العمراني، 51 سنة، دكتور و مهندس في الإعلاميات، مواطن أمريكي من أصل مغربي، مقيم فكارولاينا الشمالية منذ أكثر من عشرين سنة.
شفيق العمراني اللي تعرّف عليه المواطن المغربي إبان بزوغ حركة عشرين فبراير سنة 2011، إختار لنفسو لقب إعلامي هو "عروبي في ميريكان" نظرا لأن اللهجة ديالو شبيهة بلهجة العروبية ديال الغرب، لأنه تزاد و كبر فمدينة سيدي يحيى الغرب (30 كلم عن مدينة القنيطرة المغربية).
الدكتور شفيق العمراني معروف بالفيديوهات ديالو اللي كينتقد فيها الأوضاع السياسية و الإجتماعية فالمغريب، و كان طيلة عشر سنوات نشيط على وسائط التواصل الإجتماعي خصوصا على قناته في اليوتيوب اللي كان كيوجه فيها إنتقادات لاذعة للنظام الحاكم فالمغريب و للأجهزة الأمنية و كيتفاعل مع الأحداث الجارية فهاد البلد فحسابو الشخصي على الفيسبوك.
حسابو الشخصي الأصلي القديم اللي كان كيتابعو أكثر من سبعين ألف متابع حذفو ليه الفيسبوك بعد سلسلة تبليغات بسبب المحتوى السياسي اللي فيه.
شفيق العمراني، البارح مع السبعة و نص د العشية، و أثناء وصوله لمطار الرباط سلا، قادم من مطار شارل لوغوا في بروكسيل تعتقل مع الدخلة، يالله حط الرجل الأولى فالمطار، و هوما يقرقبوا عليه و هزوه لأحد الكوميساريات ديال الرباط.
بقا فديك الكومسارية حوالي أربع ساعات حتى جات الفرقة الوطنية للشرطة القضائية هزاتو للدارالبيضاء.
شفيق العمراني الحامل للجنسية الأمريكية و العضو في الحزب الديمقراطي الأمريكي، قام الأخ ديالو موسى العمراني هاد الصباح بمراسلة رسمية لمكتب الرئيس الأمريكي جو بايدن كيخبرو فيها بهاد الأعتقال، كما قام بمراسلة السفارة الأمريكية بالرباط و الصحافة الأمريكية المهتمة بالشأن الحقوقي.
هل إعتقال شفيق العمراني اللي كان سبق ليه جا للمغريب قبل سنتين و دخل و خرج منو بدون مشاكل، عندو علاقة مباشرة بالشكاية اللي رفعاتها الأجهزة الأمنية الثلاث DGST و DGSN و DGED (الإدارة العامة لمراقبة التراب الوطني، الإدارة العامة للأمن الوطني و الإدارة العامة للدراسات و المستندات) بالمعارضين و اليوتوبرز المقيمين خارج المغريب ؟
هل يمكن القول أن شفيق العمراني إتضح الأن أنه كاين فديك القائمة، خصوصا بعد التهديدات اللي توصل بيها مؤخرا أنه إلى جيتي للمغريب غا نغبّروك.
ثم، علاش شفيق العمراني إتحداهم و مشا للمغريب فهاد الظروف الحالية الأستثنائية ؟ و علاش دار داك البث المباشر من مطار بروكسيل اللي انتقد فيه منعو من ركوب الطائرة المتوجهة للمغريب حتى يثبت ليهم أنه مغربي، و بقا كينتقد بشكل حاد المسؤولين و الأجهزة و المليك ؟
ياك قبل سنتين دخل و خرج بكل حرية و حتى واحد ما هضر معاه، حيت ما أعلنش عليها فالفيسبوك و اليوتيوب، و المخزن ما هضرش معاه ؟
واش كاين شي حد عاقل كيتحدى غول مارق سميتو المخزن و خصوصا فهاد الوقت فين جاعر على كلشي ؟
علاش شفيق العمراني ما إلتقطش الرسالة الربّانية من الله عزّ و جل اللي وصلاتو فالمطار د بروكسيل من لي عكّسوا ليه، و يرجع بحالو من حيث أتى ؟
ثم شنو هي التهم الموجهة للمهندس شفيق العمراني؟
شنو هي الجرائم اللي قام بيها فالمغريب مثلا باش يتعتقل عليها ؟
رغم أنه لم يصدر لحد الأن أي بلاغ رسمي من الفرقة الوطنية من غير إتصال هاتفي عيطات فيه لخوه العمراني محمد كيعلموه بأن المهندس شفيق فالضيافة عندهم لمدة 48 ساعة.
من هو التالي يا ترى على اللائحة، شكون مولا نوبة من بعد شفيق العمراني ؟
يتسائل أحدهم.
ليست هناك تعليقات:
إرسال تعليق