فيما يخص الموقف من الانتخابات حتى نكون صادقين مع مبادئنا:سعد مرتاح
فيما يخص الموقف من الانتخابات حتى نكون صادقين مع مبادئنا:
- ما يمكنش انا شخصيا نشارك في انتخابات في ظل كاين عشرات من الشباب الرائعين في الحبس لا لشيء إلا أنهم عبروا على عدم رضاهم لواقع البلاد كزفزافي والرفاق ديالو..
- كيفاش نشارك في انتخابات لي تيأطرها دستور غير ديمقراطي، هاذ الدستور لي متيضمنش استقلال القضاء وهادشي شفناه في محاكمات الرييف والصحفيين، هاذ الدستور تيعطي السلطة الحقيقية في يد مؤسسة غير منتخبة وتيفرغ البرلمان من جوهر ديالو لي هو التشريع والرقابة على السلطة التنفيذية، وتيفرغ حتى الحكومة من الجوهر ديالها لي هو التنفيد وإعداد السياسة العامة الوطنية..
- صعيب نقتانع بالمشاركة وانا تنشوف ستة الاحزاب المكونة للاغلبية الحكومية (أي نورمالمو خاص تكون تتمتع بالشرعية الشعبية وانا لها حاضنة شعبية) خونات حراك سلمي حضاري جد راقي (حراك الريف) وشرعنات التدخلات القمعية الهمجية في حق الاساتذة المفروض عليهم التعاقد.
- ما يمكن نشارك وانا تنشوف صحفيين شجعان لولاهم لما عرفنا عدة ملفات كالملف المعروف إعلاميا ب "خدام الدولة" هذا صحفيين لتحكم عليهم بسنوات سجن بحال الريسوني والراضي لان داكشي لي كتبوه ما عجبش الماسك الحقيقي بالسلطة..
هادشي علاش المشاركة في نظري تتشرعن تصرفات الدولة البوليسية في حين أن المقاطعة مع إرفاقها بحملة سياسية منظمة غتعري واقع السلطة وغتبين أن ما عندها تا شرعية..
ليست هناك تعليقات:
إرسال تعليق