رسالتنا إليك لليوم 154من الحكم الجائر ولليوم 519 من الاعتقال التعسفي.
ذات ليلة عبرت والدتك عن خوفها فكتبت نصاً رائعاً حوله أحد الأصدقاء من الفصحى إلى الدارجة فكان أروع.
هو رسالتنا إليك لليوم 154من الحكم الجائر ولليوم 519 من الاعتقال التعسفي.
................................
وقت ما كنسمع السرسار ديال باب الدار من مور ما كتغرب الشمش، قلبي كيتهزّ من بلاصتو، كنقول شكون هذا اللي كيدقّ دابا، ياك ما صحاب الحال عاوتاني جاو؟
هاهوما جاو عاوتاني و جايبين معاهوم إستدعاء جديد، كيجيو غير بالليل، فاش كنت صغيرة كانوا كيعاودوا لينا على صحاب الحال اللي كيدقّوا على الديور فنصاصات الليل، هذا هو حالهوم، هاهوما جاو فالظلمة يدّيو ولدي عُمر باش ما يشوفهوم حدّ.
ولدي عُمر، حبيبي وقرّة العين ديالي، اللي عطيتو كل الحب اللي عندي باش يكبر راجل، قوي و عندو كرامة.
سمّيتو عُمر على إسم الشهيد عمر بن جلون، باش نزرعوا فيه حب الوطن و التضحية من أجلو حتى الشهادة.
أنا عطاني الله جوج وليدات فقط، عُمر و المهدي.
المهدي سميتو على إسم الشهيد المهدي بن بركة، باش نبقا نشوف فيه روح الشهيد و البطل.
عمر و مهدي ربّيتهوم أحسن تربية، تكرفصت عليهم أنا وباباهوم بداكشي اللي قسّم الله، ما عندناش و ما خصناش، ما قدرناش نوفروا ليهم داكشي اللي كيحلموا بيه گاع الأطفال فالسن ديالهوم، لكن تقاتلنا عليهم باش نقرّيوهوم فالمدرسة العمومية مع ولاد الشعب، و كانوا متفوقين فيها من التحضيري حتى للجامعة، و تحقق الحلم ديالي و ديالهوم باش أنهم يكونوا من الصفوة العلمية.
ولدي المهدي الراضي تخرّج من أهم مدرسة د المهندسين فالمغريب، لكن خوا المغريب من بعد ما مرّضوه المسؤولين و ظروف العمل المُهينة اللي لقا هنا.
ولدي عُمر الراضي، ما بغاش يخوي المغريب، بغا يبقا فيه باش يخدم الوطن ديالو من موقعو كصحفي إستقصائي و يفضح فساد الفاسدين، اللي حطوه دابا بين عينيهوم و حالفين حتى يسكتوه و يسيفطوه.
ولدي عمر حبيبي، أنا حياتي نفديها ليك، أنا راضية عليك أ ولدي، سير كمّل راك فالطريق الصحيح.
فتيحة الشاربي
ليست هناك تعليقات:
إرسال تعليق