الميت العريان...بين اخنوش وبنكيران
واحد الأخ كنت ديما مهاز معاه على البيجيدي ...كيدافع عليهم بالبكا ....
اليوم كتب ليا رسالة كال ليا فيها : شوف هاانت المغاربة ولاو يترحمو على بن كيران من كثرة المصائب اللي دار ليهم أخنوش....
و انا رديت عليه و كتبت ليه واحد القصة ديال واحد الولد فالعروبية ...مات باه وخلاه صغير ..ومنين كبر لاحظ باللي الناس ديال الدوار فينما جبدو شي حد ميت منهم كيترحمو عليه ...الا باه عا كيجبدوه وكلشي كيسكت ....
مشا الدري عند مو سولها علاش باه ما كيترحم عليه حد ؟؟؟؟
قالت ليه : آ وليدي باك كان خايب ...كان فينما تدفن شي حد من القبيلة كيمشي ليه بالليل القبر ..كيجبدو ..كيحيد ليه الكفن يديه يبيعو ...وكيرد السيد لقبر عريان ويغطيه بالتراب ...داك الشي علاش الناس ما كيترحموش عليه ...
قال ليها : والله آ الوالدة حتا نخلي الدوار كامل يولي يترحم عليه ....
ناض ولا فينما مات شي حد كيمشي ليه بالليل يحيد ليه الكفن ويخليه عريان حدا القبر ويدي الكفن يبيعو ....
ولاو الناس ديال القبيلة فينما لقاو شي ميت عريان حدا القبر الصباح كيكولو : واا الله يرحمك آ بوعزة ...نتا بعدا كنتي كترد الميت لقبر ...وما هاذ الصلكوط تاع ولدك را ولا يخليهم فلخلا عريانين .....
منقول...
ليست هناك تعليقات:
إرسال تعليق