فلاح يواجه المافيا بخنيفرة/ الرفيق كبير قاشا
هاد السيد مول الرزة الصفرا و الكاشكول دالجمعية المغربية لحقوق الانسان هو فلاح معدم ما عندو باش ينقي ضراسو، ساكن فتيقجوين عمالة ميدلت فمنطقة غنية بشجر الارز اللي فعمرو ازيد من200 سنة و 400 سنة، تيعشق الشجر و تيعشق شموخه المعانق للسماء و جذوره المتشبثة بالارض، و تيشوف بان اقتلاع هاد الشجر هو مصادرة لارواح البشر، داكشي علاش وقف شوكة فحلق مافيات يديها كي الاخطبوط، تتبيع و تشري فكل شي، من نهار تكون فمدرسة الجمعية المغربية لحقوق الانسان و ٱمن برسالتها و هو تيناضل بكل الطرق باش حتى شجرة ما تتقلع و لا تتباع، المهم المافيا اللي تتاكل من لحمنا و تتسقى من دمنا عرضات عليه مبلغ ديال 500درهم فالنهار باش هو يقضي غرض و هي تقضي غرض و مريضنا ما عندو باس، ملي السيد ما بغاش صايبو ليه ملف ديال المس بالمقدسات بغاو يكوغطوه باش يعطيو بيه درس لاي واحد تيوقف فمواجهة التران دالفساد، و من بعد بداوليه شكايات و تهديدات و ابتزازات من كل نوع، و دابا بداو معاه صيغة جديدة هي النكد ديال الدار من طرف الاهل ديالو و الاحباب بلا ما ينساو مرة اخرى جهاز القضاء اللي تيحكم بمحاضر الجدارمية و حراس الغابات و الشلاهبية و الشناقة و السمسارة، هاد السيد العظيم من قوة ما حاصروه و خنقوه و كرفسوه و احنا قصرنا في فك الخناق عليه، بدا تيفكر يقتل راسو باش يرتاح و ما يشوفش راسو محني تيركع للفاسدين لانه ما عمرو شاف شجر الارز محني، نتحملو شوي مسؤوليتنا و نحاولو نعرفو بيه و بقضيته و نفكرو في مسيرة تضامنية لفك الحصار عليه و على مجموعة من الشرفاء اللي مازال معاه حارسين الحياة على هاد الوطن و الامل في مغرب اخر ديال الحرية و الكرامة و العدالة الاجتماعية
ليست هناك تعليقات:
إرسال تعليق