سعد زغلول فؤاد ...اعتقالات وكفاح في الشمال الأفريقي وتعذيب اوفقير له بسبب المهدي بن بركة
سعد زغلول فؤاد ...اعتقالات وكفاح في الشمال الأفريقي
سامي كليب: ومن النضال الداخلي إلى القتال مع حركات التحرير والقوى الوطنية في الدول العربية كان سعد زغلول فؤاد مقاتلا على كل الجبهات تارة بالقلم ومرات عديدة أخرى بالسلاح، لم يكن شيء يوازي نضاله وشجاعته واندفاعه سوى جور الأنظمة عليه فأمضى في المعتقلات العربية جزءا كبيرا من حياته وكاد يُقتَّل فيها فماذا أولا عن تجربة السجن في المملكة المغربية؟ لماذا لاحقه وسجنه الجنرال محمد أوفقير؟
”
كان سعد زغلول فؤاد مقاتلا على كل الجبهات تارة بالقلم ومرات عديدة أخرى بالسلاح، لم يكن شيء يوازي نضاله وشجاعته واندفاعه سوى جور الأنظمة عليه فأمضى في المعتقلات العربية جزءا كبيرا من حياته
”
سعد زغلول فؤاد: هو تتبعني أنا كنت قاعد مع صحفيين في قهوة هناك فيقولوا لي ده بتاع بوليس سياسي وده بوليس سياسي وجايب مراقبين يراقبوك بشدة فأنا إضايقت طبعا وقلت الله ده هيعتقلني ولا هيعملي بتاع ما أروح له أقابله، طلبت مقابلته ودخلت له أوفقير كان وزير الداخلية قلت له يا أخي أنت شايف وأنا شايف مخبرين بتوعك بيتابعوني دايما لو مش مرغوب في أنا أسافر فورا وأسيب المغرب كذب علي وقال لي لا إحنا مبنعملش زي أي حد تاني مش زي عبد الناصر أنت حر في كل شيء وأنا بقول لك أنت حر في أي شيء ولو فيه أي شيء تعالى لي وبتاع، طبعا هو راجل كذاب يعني كله باعتلي مخبرين وبتاع وبعدين لما قبض علي هو اللي عذبني.
سامي كليب: طيب وصحيح إن هو عرض عليك في مرحلة معينة إنك تصبح مستشارا إعلاميا لدى الملك؟
سعد زغلول فؤاد: نعم لما قبض علي قال أنت تكون معانا هتكون صحفي مستشار صحفي لسيدنا للملك وهتاخد فيلا وهتاخد سيارة وهتاخد مرتب مش عارف إيه وبتاع ولقيته عندي كاتب هو ورقة كده بالعربي لازم أكتبها ست مرات إن أنا والمصريين (عبارة غير مفهومة) مدرسين وضباط مخابرات وإحنا جايين عشان نقتل الملك الحسن ونعين بن بركة رئيس جمهورية، أنا رفضت وأنا فاكر إن حط إيدي كده وقعد يضرب على إيدي (Signier) والكلام ده مرضيتش.
سامي كليب: وَقّع.
سعد زغلول فؤاد: أه وقع وقع مرضيتش أوقع فخدني عذبني من ضمن التعذيب علقني في حاجة فوق كده وبقى نازلين ضرب وبعدين ألعن حاجة ولذلك صدق رسول الله عليه الصلاة والسلام الغريق شهيد إنه غرقني.
سامي كليب: كيف؟
سعد زغلول فؤاد:برميل مياه ضخم كده وإتحط على زي المكوة الإنسان عليها بسيور جلد كده بتلف عليا وتترفع أوتوماتيك لفوق وبعدين هذا اللوح اللي أنا مشدود عليه بسيور يتقلب وينزل لحد هنا في برميل المياه بحيث النفس راح وعذاب شديد جدا المياه.. يدوس على ظهري والمياه نازلة وفيه دكتور مخبي نفسه ويعمل لي تنفس صناعي وبتاع وعملها معايا مرتين في نفس اليوم.
سامي كليب: هو كان موجود أوفقير؟
سعد زغلول فؤاد: هو أوفقير موجود وواحد ثاني اسمه معرفش إيه كده اللي بيأمر بكل حاجة معاه أوفقير ويعني كان أبشع شيء الإغراق ورفضت برضه بعديها (Signier) امضي مرضيتش أمضي أكاذيب قال أنا جاي أقتل الملك الحسن وأعمل بن بركة رئيس جمهورية وفي مكتب وكالة أنباء الشرق الأوسط المدير اللي كان بتاع المكتب ضعيف قال أه سعد زغلول إدى بن بركة ستين ألف جنيه استرليني حاجات أكاذيب يعني وكل ده كان كذب في كذب ومرضيتش أوقع أي حاجة.
سامي كليب: فيما بعد فقط لنشرح يعني كيف خرجت فيما بعد أعلن الرئيس جمال عبد الناصر خطابه الشهير عقد للقمة العربية ودعا الملك الحسن الثاني إلى القمة وطبعا تحلحلت الأمور ولذلك مُنِعت إنك تكتب عن التجربة في السجن في الصحف المصرية ولكن أنت اتهمت الجنرال أوفقير ولديك كتاب كامل وأيضا رجعت شرحته في مذكراتك إن هو فعلا الذي قتل المناضل اليساري الكبير المهدي بن بركة هنا في فرنسا.
سعد زغلول فؤاد: بن بركه بهدله وعذبه نعم ضربه بشكل وحشي وكتفه وجيه أوفقير خد..
سامي كليب: السكين.
سعد زغلول فؤاد: لا خنجر مغربي لوبيز بيشرح ده لأنه كان في فيلا لوبيز ضابط المخابرات الفرنسي وقعد يُشرِح صدره.. في بن بركة وبعدين في الأخر عملوه في مدفئة ربطوه وبالضرب فيه مات.
سامي كليب: تعرفت على المهدي بن بركه شخصيا؟
سعد زغلول فؤاد: نعم في مصر هو كان نشيط جدا كان هو زي ما أنا عملت كتاب بن بركة إنسان العالم الثالث يعني هو إنسان العالم الثالث ونشيط جدا.
سامي كليب: لأنك مش بس عملت كتاب أيضا نشرت كثير من المقالات ثم اختفى من أجل معرفة مصيره ثم اختفى فجأة وللأسف يعني عُرِف مصيره إنه قُتِل فيما بعد، طيب في المغرب اعتقلت على إنك جاسوس للرئيس جمال عبد الناصر.
سعد زغلول فؤاد: ضابط مخابرات للرئيس جمال عبد الناصر.
سامي كليب: رجعت لمصر اعتقلوك إنك جاسوس للملك الحسن الثاني.
سعد زغلول فؤاد: نعم هو مش جاسوس لا عميل لنظام عبد الناصر في المغرب والجماعة بتوع المخابرات في مصر لما رحت عميل للملك الحسن في نظامه المغربي.
سامي كليب: طيب إمتى حصلت حادثة إرسال الملك الحسن الثاني لوزير خارجيته لشرح ملابسات اغتيال المهدي بن بركة وأنت وقفت في المؤتمر الصحافي.
سعد زغلول فؤاد: في فندق شيبرد وأفشلت له المؤتمر.
سامي كليب: كيف؟
سعد زغلول فؤاد: قلت له أولا أنت بتتكلم إيه الكلام ده كله أكاذيب بن بركة خطفه أوفقير وذبحه وعذبه والشهادات ديه شهادات ضباط مخابرات فرنسية وأنت جاي هنا تكذب وتروج أكاذيب تضلل أنا هأوريك أعري نفسي أشوف التعذيب اللي عندكوا في قصر المقري أنا حطوني فيه عشان أقول أكاذيب أنت جاي هنا تقول أكاذيب وكان معايا الله يرحمه لطفي الخولي أفشلنا المؤتمر الصحفي وانسحبوا مكملوش.
سامي كليب: وشو كانت ردة..
سعد زغلول فؤاد: اسمه بن همت وزير خارجية المغرب.
سامي كليب: صحيح شو كانت ردة فعل الأمن المصري؟
سعد زغلول فؤاد:لا ولا حاجة مان مؤتمر مؤتمر صحفي مفهوش أي حاجة.
عن الجزيرة
ليست هناك تعليقات:
إرسال تعليق